Mae’r cyfnod ymgynghori statudol o 6 wythnos ar gyfer Fferm Solar arfaethedig Alaw Môn bellach (13 Rhagfyr 2023) wedi dod i ben. Fodd bynnag, rydym yn parhau i groesawu sylwadau, trwy'r ffurflen adborth ar y wefan hon, hyd nes y cyflwynir cais am Ddatblygiad o Arwyddocâd Cenedlaethol.

​

Mae Enso Energy, ar ran Wylfa Green Limited, yn cynnal Ymgynghoriad Cyn Ymgeisio (PAC) ymgynghori a chyhoeddusrwydd statudol ar Fferm Solar arfaethedig Alaw Môn, sef prosiect ynni adnewyddadwy a leolir i’r de o Lyn Alaw a fyddai’n cynnwys paneli solar a chyfleuster storio ynni gyda’r seilwaith, y gwaith a’r mynediad cysylltiedig. Lleolir y safle i’r gorllewin o’r B5112, 415 m i’r de o Lyn Alaw, 500 m i’r dwyrain o Lantrisant a 1.5 km i’r gorllewin o Lannerch-y-Medd, Ynys Môn.

 

Daeth rhybudd o gais arfaethedig ar gyfer Datblygiad o Arwyddocâd Cenedlaethol (DNS) i law Penderfyniadau Cynllunio ac Amgylchedd Cymru (PEDW) ar 15 Medi 2023.

 

Yn rhinwedd ei gapasiti cynhyrchu ynni adnewyddadwy, mae’r prosiect hwn yn cyfrif fel DNS.  Cynhelir y PAC hwn yn unol â Deddf Cynllunio Gwlad a Thref 1990 (fel y’i diwygiwyd), Rheoliadau Datblygiadau o Arwyddocâd Cenedlaethol (Cymru) 2016 (fel y’u diwygiwyd) a Gorchymyn Datblygiadau o Arwyddocâd Cenedlaethol (Gweithdrefn) (Cymru) 2016 (fel y’i diwygiwyd). Mae’r rhain yn mynnu bod y Gweinidog Cymreig yn gwneud penderfyniad ar gynlluniau DNS, gyda cheisiadau’n cael eu gwneud yn uniongyrchol i Lywodraeth Cymru (PEDW) yn hytrach nag i’r Awdurdod Cynllunio Lleol. Bydd Cyngor Sir Ynys Môn yn un o’r ymgyngoreion allweddol yn y broses o wneud penderfyniad ar y cais cynllunio.

 

Mae gwaith tirfesur pellach ar y safle ers yr ymgynghoriad cyhoeddus cyntaf ym mis Gorffennaf 2021 ac ail ymgynghoriad ym mis Gorffennaf 2023, ynghyd â’r sylwadau a ddaeth i law a mewnbynnau gan y tîm datblygu technegol, wedi arwain at wneud newidiadau yn nyluniad y cynllun.

 

Prif elfen y datblygiad yw adeiladu a gweithredu fferm solar a fyddai’n cyflenwi hyd at 160 megawat (MW) o ynni adnewyddadwy i’r Grid Cenedlaethol. Mae hyn yn cyfateb i’r galw am drydan mewn oddeutu 33,935 o gartrefi bob blwyddyn (gan ddiwallu anghenion ynni holl aelwydydd yr Ynys).

 

Bydd y cyfleuster batri storio ynni yn cyflenwi trydan i’r grid cenedlaethol ar adegau pan geir y galw mwyaf am ynni ac mae’n cyfrannu at sefydlogrwydd a diogelwch ynni. Byddai’r datblygiad yn cyfrannu at dargedau ynni adnewyddadwy a datgarboneiddio Cymru gydol ei oes weithredol o 40 mlynedd.

 

Mae’r Safle yn cynnwys oddeutu 268 hectar o dir amaethyddol, a ddefnyddir yn bennaf ar gyfer pori. Mae’r cynnig yn rhoi ystyriaeth i nodweddion lleol gan gynnwys Safle o Ddiddordeb Gwyddonol Arbennig Nantanog, Safle Bywyd Gwyllt Lleol Cors-y-Bol, rhywogaethau a chynefinoedd gwarchodedig, Heneb Gofrestredig tomen gladdu Oes Efydd Cors-y-Bol, Hawliau Tramwy Cyhoeddus a’r Llwybr Beicio Cenedlaethol.

 

Byddwn yn defnyddio mynedfeydd presennol y fferm yn Nantanog, Chwaen Gach, Chwaen Bach a Than Rallt i gael mynediad i’r Safle yn ystod y gwaith adeiladu (disgwyliwn y bydd hyn yn para 12 mis) a phan fydd y fferm yn weithredol.

 

Defnyddir cebl tanddaearol i gysylltu’r fferm solar a’r cyfleuster batri storio ynni â’r is-orsaf yng Ngorsaf Bŵer Wylfa.

 

Hoffem weld cynifer â phosibl o bobl yn rhannu eu barn am ein cynigion fel rhan o’r PAC ymgynghori a chyhoeddusrwydd statudol hwn. Mae’r cyfnod ymgynghori yn dechrau 1 Tachwedd 2023 a bydd yn rhedeg am 6 wythnos (tan 13 Rhagfyr 2023). Caiff unrhyw ymatebion i’r ymgynghoriad a ddaw i law eu cynnwys mewn Adroddiad Ymgynghori lle ymatebir iddynt, a bydd yr Adroddiad hwn yn cael ei gyflwyno gyda’r cais DNS.

 

Disgwyliwn gyflwyno’r cais ddiwedd 2023 a bydd PEDW yn ystyried y DNS yn ystod 2024. Os caiff ei gymeradwyo, bydd y gwaith adeiladu yn dechrau yn 2025 a bydd y cynllun yn weithredol yn 2026.

 

​

Anfonwch eich sylwadau ar e-bost i: alaw@ensoenergy.co.uk

 

Sgwrsiwch â ni ar: 01452 764 685

 

Ysgrifennwch atom yn: Enso Energy, Unit 1 & 2, Cirencester Office Park, Cirencester, GL7 6JJ

​

​